បាល់ទាត់៖ អតីតខ្សែបម្រើ Manchester United កីឡាករ Andreas Pereira បានចុះហត្ថលេខាចូលរួមជាមួយក្លិបបាល់ទាត់ប្រេស៊ីល Flamengo ក្នុងលក្ខខណ្ឌខ្ចីជើងរយៈពេលវែង ខណៈដែលក្លិបបាល់ទាត់មានមូលដ្ឋាននៅទីក្រុង Rio De Janeiro មួយនេះ កំពុងសម្លឹងទៅរកការគ្រងជើងឯកពាន Copa Libertadores ជាលើកទី ២ ក្នុងរយៈពេល ៣ឆ្នាំចុងក្រោយនេះ។

គួរឱ្យដឹងថា  Andreas Pereira បច្ចុប្បន្នមានវ័យ ២៥ឆ្នាំ គឹជាកីឡាករដែលមានសញ្ជាតិប៊ែលហ្សិក ប៉ុន្តែម្តាយឪពុករបស់គេគឺជាជនជាតិប្រេស៊ីល។ Andreas ដំបូងឡើងធ្លាប់ជាប់ជាយុវជនច្រើនឈុតក្នុងក្រុមជម្រើសជាតិប៊ែលហ្សិកដូចជា U-15 ដល់ U-17 មុននឹងផ្ទេរមកលេងឱ្យក្រុមជម្រើសជាតិប្រេស៊ីលក្នុងឈុតយុវជនអាយុក្រោម ២០ឆ្នាំ កាលពីឆ្នាំ២០១៤។ Andreas ក៏ធ្លាប់ជាប់ក្នុងឈុតធំរបស់ប្រេស៊ីលម្តងដែរកាលពីឆ្នាំ ២០១៨ អំឡុងការប្រកួតដែលប្រេស៊ីល ជួបជាមួយប្រទេស អេល សាលវ៉ាឌ័រ។

Andreas Pereira  បានផ្ទេរមកចូលរួមជាមួយក្រុមធំ Manchester United តាំងពីឆ្នាំ២០១៤ ប៉ុន្តែមិនសូវមានឱកាសបង្ហាញខ្លួនឡើយ ហើយក្រោយមកក្លិបបិសាចក្រហមក៏បានដាក់ចេញឱ្យក្លិបផ្សេងខ្ចីជើងជាបន្តបន្ទាប់រួមមានដូចជា Granada, Valancia និងចុងក្រោយបង្អស់ជាមួយក្លិបអ៊ីតាលី Lazio នារដូវកាល ២០២០/២០២១ កន្លងទៅ៕